Galatians 3
Vote'i sou Lapuloto Xe Vote'i sou Muxamuxaxu Tanenge
1Ngingi ta Xalatia ne ngexovulaulau misevile! Nexi telosiengixu Iesu Kalisito ne, mo ngingi ngemaisou mulili no ovu valautu no iengi ne. Ia loxovaa, maasi evile mu'oxo lolongenge sou xavutalamengi muxovulaulau ne? 2Eni amasaxa lexe atali'isinge no anu tali'i vile aloxo 'o, Ngingi ngeno'u Uleenu Tavuna no anu vote'i ma'ia manina? No anu vote'i sou ngamulinu lapuloto laixe? Uasi, no anu vote'i sou ngelomusou a'alo laixe noxou Iesu xe ngemuxaxu tangengi no anu? 3Loxovaa ngingi ngexovulaulau avile io? Ngamaisou, tei la ngingi ngesokou muamua'i noxinge no anu xaviinu Uleenu Tavuna, ia loxovaa ngingi ngatovo sou ngakalusou no anu xavingengi io? 4Loxovaa tu'utu'umaxu e muxali noxinge tei ne, ngingi ngetavulenu vitanisi, ne? Ia noxilo la eni emaisou lexe ngingi ngatavulenu vitanisi uasi. 5Lataua mulosinge Uleenu Tavuna noxou mo mu'oxonu sosovo se'i no taingengi mo ngemaisou ne. Ia tava'u a loxovaa la sou Anu mu'oxonu loxo ne? Xo ngingi ngemulinu lapuloto laixe, ne? Uasi, no anu vote'i sou ngelomusou a'alo laixe xe ngemuxaxu tangengi no anu, ne?6 aNgaxavutalanu maulixu Avalaamu loxo Lavuku Tavuna teinu muvikala aloxo 'o, “Anu mumuxaxu tanu noxou Lataua, la sou Lataua mumoxo'u lexe anu itema mulapu.” 7Aloxo ne la sou ngingi ngalavusou laixe lexe ane'i ane imuxaxu tane'i, la ane'i Avalaamu ta 'olu ane. 8 bTei manina la Lataua mulavusou lexe ili'i la ane'i ane ta Iutaia uasi imuxaxu tane'i la Anu umoxo'a lexe ta mitema milapu. Aloxo ne la sou Anu muvikalanu Avalaamu muai no nano no anu Lavuku Tavuna teinu aloxo 'o, “Noxinesi la Lataua ualusi'a ta mitema ukalusi.” 9Avalaamu mumuxaxu tanu la sou Lataua mualusou. Anu iouvilesisi aloxo ne noxi'a ane'i ane imuxaxu tane'i la Lataua ualusi'a.
10 cIa Lataua u'oxonu masuane'i ane'i ane ixavutala lexe no anu vote'i sou imulinu lapuloto laixe la ixali ta mitema ulapu no iou Lataua. Xo vaikala muai no nano no anu Lavuku noxou Lataua muvikala aloxo 'o, “Lexe ta mitema ane imulinu vaivaikala muai no nano no anu lavuku sou lapuloto laixe utotomu uasi, la Lataua u'oxo masuane'i.” 11 dLa sou anu muai lamana lexe Lataua umomomo sou umoxo'u itema vile lexe anu itema mulapu no anu vote'i sou umulinu lapuloto laixe uasi. Xo vaikala muai no nano no anu Lavuku noxou Lataua muvikala aloxo 'o, Ta mitema ane mimuxaxu tane'isi ane Lataua umoxo'a lexe ane'i ta mitema milapu mo ane'i ino'u mauli. 12 eLa sou vote'i sou tamulimulinu lapuloto laixe ne anu mii sou muxamuxaxu tanenge uasi. Xo vaikala muai no nano no anu Lavuku noxou Lataua muvikala aloxo 'o, “Itama e umulimulinu lapuloto laixe ukalusi la anu uxalisou mauli no anu.” 13 fIoxe, no anu lapuloto la muvikala lexe, itema umulinu lapuloto uasi la anu uulua. Ia Kalisito musu'ulinenge la muno'u taninenge la muulua, la muxali loxo itema sou uulua, la mulivulinenge. Sou umomomo sou vaikala muai no nano no anu Lavuku Tavuna teinu muvikala aloxo 'o, “Ta mitema ta'ei e ilili no ovu ne Lataua umaisi'a lexe ane'i iuuluasi.” 14Aloxo tei no mine Lataua mualusou Avalaamu la muvikalanu lexe ualusi'a ta mitema ane ta Iutaia uasi. Mo no anu xaixai noxou Iesu Kalisitosi la mulivulinenge, la sou alualu ane ne muxali maninasou mukalu. Aloxo ne la sou lexe nenge tamuxaxu tanenge la tano'u Uleenu Tavuna loxo Lataua musakiinu vaikalasou tei.
Lapuloto Umomosou Uxexeenu Mii Ma'ia Lataua Musakiinu Vaikalasou Tei Uasi
15Ta vivilo eni a'oxonu vaikala tovola'i vile no anu maulinenge ta mitema aloxo 'o. Loxo itema vile sexasisi sou usoli, la ilou vile isakiinu vaikala sou lexe anu uno'u tanixu, la anu loxo vaikala ne anu musakii. Ia umomomo sou itema vile uxexeenu xe umuxaxu vaikala vile no latanu la uasi. 16 gAnu aloxo tei la Lataua musakiinu vaikala noxou Avalaamu xe noxou 'ilusunu. Vaikala vile muai no nano no anu Lavuku Tavuna teinu muvikala lexe, “Noxou 'ilusunu,” laaxu lexe ta mitema tavu'alo uasi, ia muvikala lexe, “Noxou 'ilusuneni,” laaxu lexe vilesisi. Anu muvivikalasou 'ilusunu vilesisi ne, ane Kalisito. 17 hVaikala noxilo ne laaxu aloxo 'o, Lataua musakiinu vaikala noxou Avalaamu tei, xe tauu ie itemaxu mavulovexa tami'a mo mavulovexa tatalu (430) mulai mukalu xe ili'i la lapuloto muxali. Lapuloto ne anu muxali ili'i manina, la sou anu umomomo sou uxexeenu xe ukalusou mii ma'ia Lataua musakiinu vaikalasou tei uasi. 18 iLa sou loxo nenge tamulimulinu lapuloto laixe sou tano'u mimii lailaixe e Lataua mulalaxiinu sou ulosinge, la anu loxo nenge tano'u no anu vote'i sou ane musakii tei uasi. Ia no anu alauna noxou Lataua mulosou Avalaamu no anu vaikala e anu musakiinu.19 jLexe anu aloxo ne, la sou tava'u a loxovaa la sou lapuloto anu muxolu? Lapuloto anu muxali xo Lataua mumasaxa lexe susu tava'u uxali uatu lamana ulai uxali no mine Avalaamu 'ilusunu e Anu musakiinu vaikalasou tei 'ole uxali. Lataua mulosi'a ta angelo lapuloto ne la ane'i mipala'alixu noxou itema sou utulu no nixi la sou anu itema ne mupala'alixu noxinge. 20Ia lexe Lataua ne Anu vilesisi la umomomo sou itema sou utulu nonixi ne uxolu uasi. 21 kLexe anu aloxo ne, la sou anu a loxovaa, lapuloto ne mupupuiou vaikala e Lataua musakiinu tei? Uasisi manina! Xo lexe Lataua mulosinge lapuloto vile la e umomomo sou tano'u mauli no anu la anu laixe lexe nenge talomuxu mo tamulinu laixe la sou nenge latala taxali ta mitema mulapu. 22Ia vaikala muai no nano no anu Lavuku Tavuna teinu muvikala lexe, susu musakisakine'i ta mitema mukalusi, Lataua mu'oxonu aloxo ne mo sou nenge tamuxaxu tanenge noxou Iesu Kalisito, la nenge tamomomo sou tano'u mii ma'ia ane Lataua musakii vaikalasou tei lexe ulosi'a ane'i ane mimuxaxu tane'i.
23 lTei no mine 'ilixo sou tamuxaxu tanenge uxali uao, la nenge texolu no anu sakisaki sou tamulimulinu lapuloto mulai mutalo no mine 'ilixo sou tamuxaxu tanenge muxali lamana noxinge 24 mLa sou lapuloto ne anu loxo itema sou upelainge sou usaxilaingesi sou uolenenge talai noxou Kalisito, aloxo ne mo sou lexe nenge tamuxaxu tanenge la taxali ta mitema mulapu. 25Mo vaimomo 'o 'ilixo sou tamuxaxu tanenge a muxali, la sou lapuloto e tamulimulinu loxo upelainge ne usaxilainge la uasi.
No Anu Vote'i sou Tamuxaxu Tanengesi La sou Nenge Taxali Lataua ta 'Olu
26 nNgingi ngemuxaxu tangeni xe ngexolu noxou Kalisito Iesu la sou ngexali Lataua ta 'olu. 27 oMo ngingi mukalusi e nge'ulo no nano no ualasou Kalisito ne ngeno'u mo ngingi ngetokolomoxu Kalisito loxo ngetaanu tokolomo veveeni. 28 pMo ngingi ngexali loxo Kalisito ta na'u la sou kalipala uxolu no taingengi loxo ta Iutaia, mo ta Xiliki, mo ta mitema sou xaixai vitanisi, mo ta mitema ixolu no anu masaxa noxi'a mo ta mulu xe ta sema uasi. Xo noxou Kalisito la kalikalipala uasi ngingi latala ne ngexali vilesisi manina. 29 qMo lexe ngingi noxou Kalisito, la ngingi Avalaamu ta 'ilu'ilusunu xe ngingisi sou ngano'u mii ma'ia e Lataua musakiinu vaikalasou tei lexe ulosi'a Avalaamu ta minuminu ili'i.
Copyright information for
ATA